سواليف نوير(ياعيني على المسبح)

بنت ناس ... قلبها حساس السبت يوليو 19, 2008 10:35 am

السلاموووووووووووووووووووو عليكووووووووووووووووووووووم

القنبلة الانشطارية!!!!!

أهلين بنات.... اليوم قررت أن أفجر فيكم قنبلة انشطارية.. يعني (خبرين).. كل خبر سيهز الأرض ويؤدي إلى سقوط ضحايا وأشلاء....

الخبر الأول .. آآآ ... أنا مستحية أقوله!! بس لازم أصرح.. أنا .. أنا ..
انخطبت!!!!!!! والله العظيم إني أقول الصدق!!

بتقولون من هو اللي مضيع بيته ومضحي بعمره ومتقدم لك؟!

بس أنا بصراحة أستاهل... (زين وكمال وجمال وأسلوب ومؤلفات وعلم وقلم)..
وكله كوم وصوتي وأنا أنشد (طلع البدر علينا).. (كوم ثاني)!

المهم ما علينا .. أنا أدري أنكم (محترقين) تسمعون قصة خطوبتي...

أنا سأقص عليكم القصة بحذافيرها .. وكل كلمة كتبتها صدق ومن دون مبالغة...

قبل مدة اتصل شخص (حطوا هنا قلووووووب الين ما تتعبون) وقال لأبوي
السلام عليكم.. أنا فلان بن فلان الفلاني.. ودنا نزوركم الليلة بعد المغرب، أبوي استغرب وسأله.. نجهز أوراق معينة أو شي؟! يبغى يعرف الهدف من الزيارة..
ما يتخيل الموضوع زواج.. (قاطع الأمل فيني)!!- قال هذا الشخص (حطوا قلووووووب ثانية).. إحنا جايين في موضوع خطبة!!
المهم الوالد اتفق معه بعد المغرب، وجمع أخواني وقال لهم على الموضوع.. وطلب من أمي تسوي قهوة وشاهي وتستعد، وأنا يا غافل لك الله.

جاء الوقت المحدد ودخلوا الضيوف، هذا الشخص ومعه أخوه – محرم يعني – وجلسوا في المجلس اللي بينه وبين (المقلط) باب...

أنا . سبحان الله . صنفت معي أنظف كراتين قديمة في المخزن، يعني النظافة ما حبكت إلا اليوم؟!! قمت جبت الكراتين وقلبتها رأساً على عقب في (المقلط)، وهنا وقعت المفاجأة.. ظهر جيش من الصراصير وبدا ينتشر في أركان (المقلط)...

وأنقل الكاميرا إلى داخل المجلس، حيث كان هذا الشخص يقول
: إحنا طالبين القرب منكم.. وودنا نطلب بنتكم نوير، وفي هذه الأثناء يدخل صرصور سكران من تحت الباب متجهاً بكل سرعته وشجاعته إلى حيث عريس الغفلة؛
فما كان من أخي حمد وبكل بسالة وتضحية، إلاّ أنه انتبه له قبل أن يراه أحد وداسه بقدمه العارية، ثم ركله إلى تحت الطاولة وبئس المصير!!
وعاد وجلس وهو يبتسم وكأنه أراد إحضار شيء. ثم تكررت القصة مرتين... أنا دارية هذي خطة صرصورية.. ما يبغون يفارقوني... عيش وملح أنا ويّاهم!!

وأعيد الكاميرا إلى (المقلط).. حيث أنا موجودة به.. أقفز من جهة إلى أخرى خوفاً من الهجوم، وأنا أطلق صيحات هستيرية..
وأخيرا قررت الانسحاب إلى غرفتي وبلاش نظافة زايدة، وهنا لحقني سعيدان وهو يحرك حاجبيه صعوداً ونزولاً..
وهو يبتسم.. (كنه الكورة البرتقالية اللي في برنامج أصفر × أحمر لا تتهور) في قناة المجد ..
ويقول: (في واحد شاب جاي مع أخوه الظاهر بيخطبونك – طبعاً هو هدفه يجنني؛ لأنه عارف نقطة ضعفي –
أنا تصببت عرقاً وبدا قلبي في الخفقان، ونشف ريقي، وما (مداني) أستمتع بهذي اللحظات إلا سعيدان (تحسف)
يشوفني أصير أنثى وقت خطوبتها قال لي: تراني أمزح، هم جايين يسلمون على أبوي وعندهم شغل معه!!! (قمة النذالة)!

انتهت الزيارة على خير ووعده الوالد خيراً على أن يمهله أسبوعين يسأل فيها عنه، ثم يعطيه الجواب النهائي...

والحمد لله تمت الخطوبة والزواج في الصيفية..

ومن هنا سألقي القنبلة الانشطارية الثانية..

وهي أنني قررت أن أعتزل الفن، وأتوقف عن كتابة هذي السواليف! تدرون أني من الآن فصاعداً سأكون ربة بيت محترمة ولامعة..
وأهتم بزوجي وخالتي. الله يرحمها. وأتحول من آنسة إلى سيدة، وسأبدأ في التجهيز!! – وما ني فاضية لسواليف البزارين هذي!!! (علينا؟!!!
.... الحين صارت سواليف بزارين؟!!)

صحيح إني فرحانة بأشتري كل اللي على بالي..
بس أقول الصدق؟ ضايق خلقي من الأسواق والمشاغل واللبس اللي صعب تلقين شيء ساتر وراقي في نفس الوقت.. الله يجيرنا..

أقول لكم شي...!

أنا خانقتني العبرة والله العظيم؛ لأني بودعكم...

أنا حبيتكم كلكم وحدة وحدة...

شكراً لكم على دعمكم وتشجيعكم لي...

ادعووووولي يا بنات أتوفق.....

وأخييييراً:

السيدة .... نوير!